02/12/2009
Morrió la poeta valdesana Nené Losada Rico, decana de les lletres asturianes
tierraalantre 12-04-2009 GTM 0 @ 14:38
La fin de selmana ta siendo tráxica pa la lliteratura n'Asturies. A la muerte de la novelista Corín Tellado, qu'anunciábemos va hores, súmase agora la perda de la decana de les lletres asturianes, la escritora valdesana Nené Losada Rico, que mos dexó esti sábadu, a la edá d'87 años nel Hospital de Xarrio, en Cuaña. Los sos restos mortales tán nel Tanatoriu de Barcia. El funeral va celebrase mañana a les 18,15 hores na Ilesia Parroquial de Santa Olaya de L.luarca.
La escritora, considerada decana de les lletres asturianes, ñació en L.luarca'l 10 de payares de 1921. Tres años depués, al morrer la madre, llévenla a Sanfliz de Trevías, pa cola güela. Ellí diba vivir hasta que, con diecinueve años, casa y torna pa L.luarca, onde sigue viviendo. De formación autodidacta, amuésase como una temprana escritora de relatos y poemes en castellán. Tiempu más tarde, empezará a facelo na llingua del so llugar, utilizando formes poétiques mui cercanes a les de la poesía oral popular. En 1992 recoyó bona parte de la so obra en versu nel volume Cantares valdesanos, n’edición de Consuelo Vega, que se completa col nuevu llibru poéticu apaecíu en 1997 col títulu de Entre apigarcios, dende entós espublizó tamién la so obra en castellán nun volume completu.
L'autora recibió numberosos homenaxes y premios. Col so nome convócase cada añu un premiu de poesía. Nel añu 2000 recibió l'Urogallo 2000, entregáu pol Centru Asturianu de Madrid, al que nel 2005 se-y sumó la medaya de plata del Principáu d'Asturies. En 2007 recibió'l Premiu Timón que concede l'Arribada, pola mor de la so trayectoria lliteraria, y en 2008 foi nomada Fía Predilecta del Conceyu de Valdés.
Cola muerte de Nené Losada Rico la lliteratura asturiana pierde una de les sos voces hestóriques, una de les últimes figures de la nomada Xeneración de la Posguerra, que nos últimos años dexó nel camín a escritores como Mánfer de la Llera o Eva González.
N'alcordanza de Nene. Esta foi la ultima entrevista grabada a la nuesa querida poetisa valdesana Nene Losada Rico.
(d'Asturnews, 12-04-2009)
Fálame de paz, NenéSemeya de Inaciu Galán y González
Inaciu Galán y González
Marchónos Nené Losada Rico, una bona escritora nos peores momentos pa selo escribiendo n’asturianu. Una muyer que prestaba tratar, cariñosa, dulce, amable y nada allabanciosa pa consigo mesma.
Los que tuvimos la suerte de tratala en dalguna ocasión pudimos conocer a esta muyer cola que prestaba falar, pero sobremanera, a la que prestaba sentir. Alcuérdome de vela recitando poemes de memoria con una facilidá ablucante y con una voz sele, pero firme, dulce pero enllena de mensaxes que pocos autores de la so xeneración fueron a espresar nos sos testos. Y too esto cerca de los noventa años.
Cola marcha de Nené, desapaez tamién una xeneración que foi pasu ente pasu dexándomos solos, la Xeneración de la Posguerra, a la que pertenecíen autores como María Josefa Canellada, Mánfer de la Llera, Eva González, Llorienzu Novo Mier y tantos otros, que tampoco nun tán yá con nós.
Esta xeneración foi ponte perimportante ente los escritores d’entamos del sieglu XX y el modernu movimientu lliterariu de finales de sieglu. Nené y los demás de la so Xeneración caltuvieron viva (unos con más aciertu, otros con menos), la llama de la lliteratura escrita en llingua asturiana na llarga dictadura. Colos sos testos medraron munchos de los escritores que dempués diben formar parte del Surdimientu, n’ellos atoparon la xustificación hestórica a una recuperación lliteraria en llingua asturiana, los pegoyos pa sofitase y da-y fuelgu a una lliteratura que venía perdiendo puxu.
De la mesma forma Nené atopare’l so finxu nel Padre Galo, un escritor al que tuvo mui cerca. A Nené prestába-y cuntar los sos alcuentros con esti escritor muertu poco dempués de la fin de la Guerra, que conociere a so madre más que la propia escritora y que Losada recordaba con ciñu. Supongo que la hestoria, tamién la de la lliteratura, ye cíclica.
Nené dexónos, pero la so lliteratura va siguir siempres con nós. Vamos echala de menos, claro que sí, pero lleendo los poemes podremos recordar la so voz recitando, tienra y enllena d’amor: “Con palabrinas d’amor / Fálame de paz na tierra” escribió Nené. Descansa en paz nel cielu, contésto-y, esperando que me sienta ellí onde tea.
Esta ye la meyor oración que se pue rezar por ella:
FÁLAME DE PAZ NA TIERRA
Con palabrinas d’amor
fálame de paz na tierra.
¿Ónde ta la palombina blanca?
¿qué foi d’el.la…?
Dime que nun ya verdá
eso que la xente piensa
que, ha muito, a la palombina
tiénenla presa.
Ya dicen que la probina
inda nel sou picu l.leva
una ramina d’olivu
que se foi quedando seca.
Si la hestoria ya verdá,
inventa pa mi outra nueva
con palabrinas d’amor;
fálame de Paz na tierra.
Nené Losada Rico
Licencia:CC Reconocimiento NoComercial SinObraDerivada
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
