Bienvení@'l mieu blog chafallu :P ya gracias pula vuesa paciencia pur la tardanza de llograr esti blog,deixare dalgún camentariu :)
21/07/2006
Nuea categoría nel blog...pus sí,"Lus traxes tradicionales Çamoranos",ya diba siendu hora de facer'esti trebayu.Pa mieu,perimportante...razones varias,ya sobrutó,çamoranas.
Munchas gracias lus que collaboranon Deixare ñidiu que dalgunas cousas,fonun sacás,de fuentes cun "copiraiiii",asina,comu:"La Zamora que se va-Carlos Piñel" ou dalgunos documentos recoyíos nos fondos etnográficos de Caja España…
Introduición:
Nun ía fácil describayare sobru'l trax tradicional,ya que nin siquier hay un estudiu ampliu,ya lus qu'hay,soden erróneos,siguiendu tópicos llibremente,comu,relacionar el trax cun culturas ya tiempos llonxanos,sin sabere qu'estas cousas evoluicionan,ou punxiar a esti comu si fuere un "farramacu",cousas braeiramente ablucantes y'ensín xacíu...
Ya falandu de tradición(havere...¿qué mos diz el pallabreru?..."transmisión sucesiva,de xeneraición en xeneraición"...),vamos partire d'esa basa.Lus traxes ya las suas prendas,caltienense durante munchu tiempu,ensin evolucionar,entós,la nuesa indumentaria sedría perantigua,peru'n rïalidá,soden munchu mas modernos de lu qu'albirdramos;
Mujeres alistanas,pur Jacinto Alcántara;Sejas d'Aliste.
Si facemos un análisis de toos lus componentes que caltienense conserváos (milentas de piezas) mos llevan a dataiciones comu mas allá lus 150 ou 200 annos(a exceición las del sieglu XVIII),ya c'un mayor porcentax las ellaborás nos cabeiros annos del XIX ya cimeiros del XX.(Doutras cuestiones perdiferentes;las teunicas ya ellementos decorativos);Toos lus traxes tradicionales(dichu pur unanimidá d'antropólogos ya hestoriaores),imitan las modas cultas,courtesanas ou de ciudá,d'antañu,sólu que c'un retarsos mayores y'adataiciones llentas.
El trax que nomamos "típicu","tradicional","popular" ou "rexional",ía ya fou siempres asina,vivu ya camudante,enxamás fosilizáu,siempres que daqué nueu prestaba a lus nuesos antepasáos (comu sucede ágora mesmu),adotábase y'añedía pa la sua ostentaición;pur exemplu:Lus mantones de Manila ou pañuelos(ía dicire ,de Filipinas)que invadienon too'l reinu a cabeiros del sieglu pasáu(ágora,entrúgoume,¿daquién diz que'l mantón nun ía tradicional?).
Estu desplica tamién,l'hechu que nos lláos mas comunicáos,más ricos ya c'una más amplia cultura(comu las ciudaes),haigan perdíu munchu antes la sua antigua indumentária.
Pul contrariu,las comarcas aislás,caltienen pur más tiempu las suas costumes,evolucionandu cun mayor lentitú(comu lus pueblos).
Xoven charra.Fotografiá nas folixas de Setiembre'l 1936.
D'ehí las diferencias tan esgrandiayás d'unas comarcas o llaos determinás,que calteniendu las suas manifestaiciones n'ellemeuntos,xoyas...nun asimilanon las novedaes mas igualitárias que provocan la pérdida lus suos valores culturales,propios y'autótonos,n'outros llaos el pasu'l tiempu barrióu formas de vida ya tradiciones.
Estos datos,que duranti tool trebayu expondré,puen desplicanos tamién el purqué conviven en determinaos lláos,técnicas ya oxetos ou prendas d'indumentárias...el purqué tan ehí(pur la hestoria,las comarcas vecinas(que se las tién pur mas afortunás,teniendu'n cuenta,que Çamora ía la comarca mas castigá'l nuesu país)...
Doutros aspeutos,mos desplican el panorama la nuesa arcaica indumentária,na sua evoluición(l'influéncia d'ésta),las preferencias que mos dan lus vecino(que raru,que'n tool trebayu,solu fálase del país llïonés...nin sisquiera las suas fasteiras...que raru...),las creencias,la contaminaición ou aculturaición(en fin...),estatus economicos y culturales ya la llenta asimilaición de lu nueu.
Intentaré,n'esti trebayu,non rellaicionar(ya qu'ía una equivocaición) determináos traxes del nuesu entornu,cun épocas ou culturas llonxanas(asina,comu referencias mozárabes/xudías,ou fasta "lu celta")
Manguitos ou piquiñu xubón infantil,Aliste,1900
Perdonar que seya tan esgrandiayá l'introduición,ya tengáis que lleeros toa la parrafá xD!!,al final decidí xuntare toas las entrás pa nun facere un llíu a la xenti...
Saludines asperu que vos preste.)
El Norti Çamoranu ya Sud de Llión
/Semeya:Maragatos:Laurent;Madrid,1878.Coleición particulare,Çamora(Fonti:Carlos Piñel,Llibru)/
Toa la franxa nortenna cun llímite'n tornu a la ciudá de Benavente,tien unas carauteristicas comúns,cun piquinnas difereincias pa las suas destintas comarcas.Cal remarcare qu'el trax sud de Llión tamién participa n'esti territoriu.
Si daqué carauterizan lus traxes (n'esti casu ía'l femenín) de l'arïa nomá,ía l'usu'l nnegru nos aballorios:
/Semeya:Trax femenín de Senabria/
TRAX CEREMONIAL:
N'esta vestimenta estacan lus sobrios ya ellegantes RODAOS (de collores oscuros:marrones color pasa...),xuntu a lus de panno nnegru,ou bordaos cun agremanes nnegros de vidriu ou pastas imitandu l'azabache,ya cintas sobrepunxiás(d'un ourixen más arcaicu);CORPINNU,GABACHA ya MANDIL nnegru cun la TOUCA ou MANTIELLA,componen el trax ceremoinial de collores discretas ou "serias",cun finalidá ceremoniousa (bodas-enantias casábanse de nnegru-,pa direa misa...).
TRAX DE FOLIXA:
RODÁU de collor (roxu,verdi y'azul (*) ) u atópanse sopuestos nnegros d' "azabache" estacandu sobremanera.La CAMISA n'esti casu,sedrá de punnos ya cuellu polícromos (ehí la deferencia cun l'Alistana) cumu las del Sud de Llión.GABACHA,pannuelos estampaos ya de MERINU,xuntu'l CORPINNU,MANDIL,MEDIAS ya ZAPATU ABOTINÁU.
Complementos dientru lus traxes:
/Semeya:Collares de pasta vítrea (imitandu’l coral ou l’azabache)
COLLARES DE VUALTAS,qu’en dalgunos lláos(Puebla Senabria…)sedrán d’ouru(cuandu acompannan al trax ceremonial ya la mujer ía pudiente);sartas de borlas(charras),ya delicás cadenas pertuesas permitirán cruces de filigrana cun un piquinnin esmalte central(ciudá de Sallamanca)
Lus pendientes,n’esti casu sedrán d’ouru,tamién,casi siempres pertueses de chapa d’ouru embutíu ya repuxáu(en forma de uvas,bellotas,etc)
Las senabresas,en cámbeu,llucirán collares -tantu nel festivu cumu’l ceremonial- de pasta vítrea (imitandu’l coral ou l’azabache) y’a vegás formás pur cuentas polícramas,siguiendu modelos d’antannu.Estas vualtas,podrían dire solas,cun cruces de prata ou acompannás de pendientes del mesmu material,d’orixen llïonés.
*Al ser norti Çamora xuntu a Llión ,el pendón ta presente n’esta zona,asina lus collores básicos del pendón “faen xuéu” cul trax de folixa.(nun sabedse s’ía casualidá ou fechu a posta).
/Semeya:Çamorana,Valles del Tera,Vidriales,Benavente/
Si mos diriximos a l’Esti la franxa Nortenna,estacan lus encaxes d’ “azabaches” qu’hay en GABACHAS,MANDILES ya RODÁOS,en forma de bandas anchas ya las baxeras,nos qu’abondan,tamién ,las piezas móviles colgantes (borlas,etc),del mesmu material.
/Semeya:Çamoranas La Carballeda ya Benavente/
Las CAMISAS nnidias de linu femeninas,caltienen bordáos policromos en punnos ya cuellu(roxos,azures,marrones,esverdiayáos,ocris),de gran perfección ya finura,cun técnicas cumu‘l:TEXIDIELLU ou ACOLCHÁU,ya’l puntu cruz. (güedeyar: http://paislliones.gugara.com/frisneu/post/2006/05/03/confeiciones-de-traxes-tradicionales-del-pais-el-bordau )
Sucede lu mesmu nas distintas comarcas cercanas de Llión,ú atopamos iguales complementos na indumentaria,cumu diz Donna Concha Casado Lobato nel suo llibru d’indumentaria llïonesa,cumu prendas bordás cun llana de varias collores ,ya sobrutoo PICAOS,en MANTEOS y RODÁOS amariellos,PAXIZOS,cun temas decorativas florares (formas delgás ya poucu densas),utilizáos tantu nos valles Çamoranos cumu nel Baxu Órbigu ou La Banneza, lu mas destacáu d’ambas utilizaiciones ían lus nnumerosos MANDILES de pannu rayáu esverdiayáu ou nnegru, cun bandas de PICÁU en roxu,d’ellementos decorativos xïométricos ya frorares esquemáticos.
/Semeya:pannuelu d’hombros cun frores polícramas/
PANNUELOS ou MANTONES nnegros,bordaos cun frores polícromas(estacfandu'l roxu),iguales a la zona la Lagartera toledana,totalmente diferentes a l'estética carauterística la zona,la sua presencia na zona pue,seguramente,desplicase pur lus contautos comerciales(quiciabes la arriería),ente ambas zonas distantes.
/Semeya:Pannuelu nnegru benaventanu/
Complementos del trax:xoyiería popular.
L'espaciu xïográficu ente la Carballeda ya Benavente,participa'l focu astorganu(formandu parexa las comarcas del Norte,cumu centru la propia Astorga)u atopase perfeutamente documentá l'esistencia d'arcaicos talleres de platería nos qu'ellaboraban las carauterísticas piezas.
La prata,na sua collor ou sobredorá,ía'l metal protagonista d'una gran variedá d'oxetos dedicáos a l'ornatu'l cuerpu.
Cararcterizan d'esta zona,lus esgrandiayáos COLLARES de prata ya coral,compuestos pur:las BOLAS (ou BOLLAGRAS,que presentan la superficie recubiertas de piquinnos ellementos decoratievos distribuíos simetricamente ya soldáos pur la metá pur mediu de teunicas tradicionales ya lus ALCORCILES ou CARRETES.
Collares de coral,enllazáos cun las piezas de prata,(annadiendu,a vegás,MEDDALLAS,RELICARIOS ou CRUCES,de gran tamannu.)torneáu ou'n llíneas las cresterías renacentistas(d'ú provienen)
/Semeya:Manteos ya Rodáos paxizos/
Estacan d'ent'eillos,las esgrandiayás MEDALLAS de llaminas planas,nomás PATENAS,circulares ou cudrangulares,representandu n'ellas:imaxenes del Cristu,La Virxe ,efixies de Santos...,toas eillas de pergran cualidá teunica y'artística,fechables mas pul Renaicimientu,prósimu a l'entamu'l sieglu XVII.
/Semeyas:Bollagras,alcorciles...--Cruz de prtata,cun extremos frordelisáos/
La pieza mayor (PATENA,RELICARIU ou CRISTU BARRIGÓN ya CRUCES) ocupan la parti central del collar,pavias qua lus lláos collócanse RELICARIOS ya MEDALLAS de llabor calá,con efigies de la Virxen tratá siempres n’autitú hierática,frontal,revestía y’ entronizas ya la imaxe de Santiagu Matamoros a caballu ya diversos Cristos.
/Semeya:Cristu barrigón ya medalla de collará/
Soden frecuentes las CRUCES cun estremos en lises,formales ya estéticos nel góticu final ya lus esgrandiayáos MEDALLONES (abombáos ya convexos) conocíos na zona cumu CRISTOS BARRIGONES OU PRENNAOS.
Na composición lus grandes collares hallamos RELICARIOS -cun frecuencia Astorga ya de plata ya “Corazón de la novia”de simillar forma característicamente la forma cordiá ya elementos colgantes ya móviles.
Tamién,semejantes collares,atopámoslos,sobrito na sierra de Francia Sallamantina,ú sedrá signu destintievu la mayor abundancia ya tamannu las piezas.
El segundu material qu’atopámos ía la composición de collares,fou la pasta vítrea,trasllúcida ou opaca.Atopámoslas en destintas variantes:Pur un lláu,bolas ya sartas imitando l’azabache ou’l coral cun formas arredondás sustituyendo lus materiales d’enantias nomáos pul suo baxu coste.D’inercia,podemos situar mas ou menos estos materiales nas zonas mas pobres ya n’outras prósimas cumu Aliste,precisamente’n xeitu invertíu a las esgrandiayás COLLARÁS de plata y’autenticu coral.
/Semeya:Plata de la zona Noretnna de Çamora.Güedeyandouse nimiamente los CARRETES o ALCORCILES/
Tamién cun pasta vítrea,ellaboranse cuentas policromas de basa nnidia ou nnegra,azul…La relación qu’atopase d’estas cuentas cun piezas del mundi Tartésicu ou Feniciu-Púnicu acreditarían la teoría duna posible pervivencia en las nuesas comarcas oucidentales.La sua vía de penetración unía l’intensu comerciu de metales,podía havere síu pur la Ruta La Plata,de Sur a Norte ya dende lus sieglos VII ya VI a.C.(acreditando estas épocas:atopánonse restos iguales peru’n Sallamanca d’impossible datación quen un seya la que digu)
/Semeya:Collar de norte Çamora,collocás simétricamente:MEDALLAS,BOLLAGRAS ya un CRISTU BARRIGÓN)
Peru tornándu a lus collares de sartas colloristas(tantu tonos de coral,cumu polícromos),ya pa finare,diré qu’utilizánonse,a vegás,solos-cun dalgún ou varios ellementos colgantes(MEDALLAS,RELICARIOS,CRUCES ou AMULLETOS),de piquinnu tamañu-,cumu acompañaos de collares cun BOLAS y’ALCORCILES,n’esti casu de mayor tamannu.
De prata soden tamién lus grandes pendientes nomáos “de calabaza”,feichos pur un aru,del que prende la “calabaza”(a vegás de gran tamannu) calá de filigrana,cun pequennos colgantes móviles en xeitu de GOTERAS ya culombas.
Outru tipu paecíu d’esquema,ía l’anteriormente descritu,lu que camuda,ía lu que pende del aru,que soden un rematáu de cincu pequennos colgantes cun xeitos grandes ou bellotas,que fae remembrar a una manu.
Cun frecuencia el gran aru sepárase de la pieza colgante(en tiempos recientes)úsandouse cumu pendiente solu’l primeru,pavias las CALABAZAS ya “manos”,atopámoslas formandu parte de collares.
/Semeyas:Extremu separáu d’un de lus grandes PENDIENTES D’ARU,n’esti casu ía una “manu”/
Muy carauterísticos de la zona soden lus grandes pendientes cun xeitu d’aru planu ou de “fierraúra”,en prata,latón ou bronce,llisos en dalgún casu,yá que n’ocaisiones van decoráos cun incisiones ya bordes que remátanse c’un cordón ou alambre ondulante;d’asemeyá tipoloxía.
Cun piedras colloristas(l’ardecó llïonés) ficiénonse na zona las nomás POLCAS ,cun pieza central superior ya tres colgantes en paralelu,éstas mesmas aparecías n’outras árïas sallamantinas,feichas d’outru material.
De toas las xoyas descritas se puén constautar la sua preseincia nas zonas citás del Norti çamoranu,cun elleváu nnúmberu d’exemplares ya perdestacáos,sobru too nel valle de Vidriales(ensin embargu esta pieza tien un arïa d’expainsión pergrande,si que cun exemplares mas esporádicos ya d’inferior cálida a medida que mos acercamos pal Sud,cumu Aliste,Tierra’l Pan ya la d’Alba).
/Semeya:Calabazas/
/Semeya:pendientes d’aru ou fierraúra,Benavente/
/Semeya :Aros de lus pendientes astorganos/
Intentar acercanos al nuesu patrimonio cultural mos llevará duna manera ou doutra a algunas sinnas d’identidá,n’esti casu la INDUMENTARIA.
Bonas Licia:
Prestoume asgaya el tou artículu "El Norti Çamoranu ya Sud de Llión" y gueyare las fotos.
Tamien prestaríame falare presonalmente si vienes a Llión esti branu. Si lu faces mándame un correyu lletrónicu.
Si te presta pues visitare'l mieu blog:
www.ellagodelaxana.blogspot.com
| ||||||
Amestar feed a:
Contautar col autor |
Archivu
| Quies facer un Blog equí
Sitiu desendolcáu, diseñáu y xestionáu 100% con Software llibre: GNU/linux, GIMP, PHP, MYSQL, APACHE, ...
